【長憂九十九】苗彤堅拒同爸爸合作 三哥自嘲麻甩佬一名 – R One Space
In:
Date:
Post Tags

【長憂九十九】苗彤堅拒同爸爸合作 三哥自嘲麻甩佬一名

苗僑偉(三哥)同囡囡苗彤、米雪同姨甥女徐頴堃(Erica)等,今日去到觀塘為共享工作間主持揭幕禮。三哥細仔剛剛畢業,囡囡苗彤又做咗專業攝影師,問到係咪放下心頭大石?三哥話仔女都大個,但佢就仲擔心咁話:「養兒100歲,長憂99。」問到係咪擔心佢哋結婚生仔?三哥笑言:「呢個係人生必經嘅大事,睇吓幾時啫,順其自然。」苗彤就話爸爸冇催佢哋結婚:「我好忙,都冇時間拍拖,我喺加拿大住,會影相同演戲,嚟緊會去台灣拍旅遊特輯。我都會請教daddy,大家研究吓演技。」三哥笑指:「係西方同中華文化溝通。」不過苗彤就未有打算喺香港拍戲,問佢唔想父女合作咩?苗彤好堅定咁話:「唔想,business還business,私人還私人,唔可以同daddy一齊。」

提到三哥最近開咗ig戶口,佢話:「不嬲都有,個女幫我搞,張新相係佢哋捉住我影,同仔女玩完影低咗就放上去,多個渠道溝通。」身為攝影師嘅苗彤就話好少用爸爸做模特兒,三哥就自嘲唔靚仔,只係麻甩佬一個。

另外,米雪同姨甥女Erica少有合作,米雪話為咗姨甥女,之前接咗套古裝片,仲一齊去到大陸拍攝,雖然兩個冇乜對手戲,不過Erica就可以乘機偷師,米雪就大讚Erica口齒伶俐記性好,又識多國語言,好適合做主持,佢仲話Erica好窩心,成日都會畫畫寫字條貼紙畀佢,米雪都一一儲起。提到聖誕,米雪就話要不停周圍飛,除夕會有個大騷要獻唱,檔期已經排滿12月。

(2018-12-05 蘋果日報)

(Link)

0 Comments

Leave Your Comment